Коми мулысь кольöм кадсö туялысьяс мам кывъя газет-журнал йылысь сёрниын пырджык казьтыштöны Дмитрий Степанович Поповлысь да Виктор Алексеевич Савинлысь нимъяссö. Буретш найö пö вöчисны панассö коми печатьлы, сійö ылі воясас босьтчисны лэдзны Комиын медводдза газет.
Тайö тадзи и эм. Нёбдінса Витторлысь олöм-вылöмсö да творчествосö кö пыдісянь да гöгöрбок тöдмалöма, то Дмитрий Попов йылысь талун гежöд морт мыйкö вермас висьтавны. А öд буретш Дмитрий Степанович вöлі "Зырянская жизнь" газетса медводдза редакторöн, кодлöн первойя номерыс петіс Усть-Сысольск карын 1918 волöн июнь 10 лунö.
Но сэкся гудыр кадö том мортлы эз мойви дыр уджавны выль петасад. Сы весь-кöдлöм улын лэдзисны сöмын 11 номер. Сэсся Дмитрий Степановичöс виччысь-тöг вештісны удж вывсьыс. Мыйла нö тадзи лои? Том редакторöс мыждісны эсеръяс дор сулалöмысь да сыысь, мый быттьöкö аснаукöн саймовтіс лыддьысьысьясысь ВЦИК-лысь да СНК-лысь "О комитетах бедноты" Декрет. Сöвет власьтлысь индöдъяссö пыдди пуктытöмысь Дмитрий Степанович сэки муртса суд улö эз веськав. Дзумгылісны морттö весиг кöрт таса öдзöс сайö. А регыд мысти бöр лэдзисны.
Аслас олöмын тайö лоöмтор йывсьыс Д.С.Попов некор эз гижлы ни эз казьтыв. Но кодкö öд отсаліс том мортлы мездысьны ВЧК-лöн чорыд гыжъясысь. Коді нö вöлі тайö мортыс?
Ме думайта да, Дмитрий Степановичлы сэки нюжöдіс кисö да отсöг сетіс батьыслöн нималана вок, Дмитрий Яковлевич Попов, коді 1918 вонас уджаліс Усть-Сысольскса уисполкомын комиссарöн, а коркö вöлі Государственнöй Думаса депутатöн. Сійö кадö со мый гижліс Дмитрий Яковлевич йылысь Вöлöгда карын петысь "Северное эхо" газет: "Совдеп индіс земствоса комиссарöн вичкоса поп Д.Поповöс. Сылы сетöма ыджыд правояс: комиссар вермö ас кöсйöм сертиыс мездыны удж вылысь земствоса служащöйясöс, весиг бöрйöмаясöс".
Тайö жö "Северное эхо" газетыс 1918 вося июнь 26 лунö йöзöдіс неыджыд юöр: "Июнь 10 лунö, выльлунö, петіс "Зырянская жизнь" газетлöн медводдза номер. Лэдзысьыс — Усть-Сысольск карса Совдеп. Чужöмбаныс газетыслöн абу кулитана, пытшкöсыс жö тырöма официальнöй юöръясöн"
Д.С.Попов йылысь тайö пасйöдъяссö лöсьöдігöн гоз-мöдысь воліс юрö мöвп: кыдзи нö вермис том морт, таö ньöти дасьтысьтöг да велöдчытöг, лэдзны газет, гижны статьяяс? Öд сылы вöлі муртса 22 арöс, сэк кежлö помавліс сöмын Усть-Сысольскса духовнöй училище да Вöлöгдаса духовнöй семинария. Тайö юалöмъяс вылас кутшöмсюрö вочакыв позьö аддзыны Дмитрий Степановичлöн автобиографияысь. Сэні зонка гижö, мый босьтöмаöсь духовнöй училищеас велöдчыны зэв сьöкыда, кыдзи батьтöм-мамтöм зонкаöс, "сирöтаöс". Батьыс Дмитрийлöн, Степан Яковлевич, коркö помавлöма Усть-Сысольскса духовнöй училище да пыр уджалöма вичкоясын вежа айлы отсасьысьöн (псаломщикöн). Вылöджыксö абу и быдмылöма, зэв ёна юö вöлöм да. Сэсся и дзикöдз шыбитöма семьясö да пышйöма Сибирö. Та понда училищеас велöдчигöн курыд зеллятö радейтысь псаломщик питö ёнакодь öтдортлöмаöсь.
Ас йывсьыс Дмитрий Степанович тадзи гижліс (сетам рочöн, мед лоны дзик стö-чöн): "...Как "сирота", сын пьяницы, исключенного из духовного сословия, я должен был со смирением выслушивать в училище длинные нотации за малейшую шалость и постоянно чувствовать оказанное "благодеяние". Плохие отметки означали для меня снятие с казенного или полуказенного со-держания, которым я пользовался как "сирота", а вместе с этим прекращение учения... Боязнь доставить лишние хлопоты матери, а так же страх оказаться на улице и, быть может, пойти по стопам отца, заставляли меня учиться сравнительно хорошо".
Кыдзи аддзам, Дмитрийлы быть лоöма бура велöдчыны. Кутан кö дышöдчыны, пыр и вöтласны училищесьыд. Содтам татчö: медводдза тöдöмлунъяс зонка босьтöма Нёбдін сиктса церковно-приходскöй школаын; дас арöсöн пырöма ве-лöдчыны Усть-Сысольскса духовнöй училищеö. Сы бöрын — Вöлöгдаса духовнöй семинарияö, сэсся Перымса университетö, кöсйöма лоны юристöн... Сідзкö тай, абу дзик нин велöдчытöм вöлöма мортыс, пыр зільöма водзö воськовтны, ассьыс тöдöмлунъяс содтыны. Мöд туйöд олöмас мунöма, батьсьыс торъялана ордымöд...
Ассьыс челядьдырсö Дмитрий Степанович шогпырысь казьтылö: "Чужи ме Север-нöй крайлöн Великöй Устюг карын 1896 вося август 2 лунö. Батьö сэки уджаліс вичкоын псаломщикöн. Таысь вылöджыксö сійö кыпöдчыны эз вермы. Батьö вöлі ичöт грамотаа, вина радейтысь да некытчö туйтöм мортöн. Торйöн ёна курыд зеллятö мöдіс видлавны менам чужöм бöрын. И вочасöн дзикöдз юсис да некор нин эз вермы мездысьны тайö лёкторсьыс. Уджалыштас вичкоын 5-6 тöлысь, видзöдан да, бара нин вöтлöмаöсь вина юöм вöсна. Эновтас гöтыр-челядьсö да шöйтö-ветлö кöнкö быдса во. Коркö-некоркö локтас архиерей дорö, юрсö öшöдöмöн аслас грекъяс йылысь казьтыштас, а архиерейыдлöн бара на жальыс петас батьлöн уна челядь вöсна да мöд вичкоö мöдöдас псаломщикавны. Таöдз, дерт, прамöя гогналас-стрöжитас юысь морттö, манастырö на мöдöдлас и. А Чуклöм сиктö овмöдчöм бöрын бать дзикöдз эновтіс миянöс. Муніс Сибырö да бöрсö эз нин волы".
Степан Яковлевич аслас гöтыр Лидия Ивановна Полякова-Поповалы колис поз тыр челядь, быдса квайт ныла-пиаöс. Медся ыджыдыслы тыри 15 арöс, а шег кодь ичöтыс потанын на куйліс. Но Лидия Ивановна тайö сьöкыдлунъяссьыд абу шöйöвошöма ни повзьöма. Чуклöмсянь вуджöма овны Усть-Сысольскö, карсьыд аслыс удж аддзöма, пи-нывсö, кодъясöс государство лыддьöма бать-мамтöм челядьöн, "сирöтаясöн", водзö быдтöма-кыпöдöма. И ставнысö, нёль пиöс да кык нылöс, вермöма сувтöдны кок йылö, быдöнöс на пиысь велöдöма. Кодкö помалöма институт, кодкö техникум, кодкö училище...
Вöлöгдаса духовнöй семинарияын Дмитрий Степанович велöдчис вит во. Ачыс казьтылö вöлі: зіли пö босьны тані унджык тöдöмлун. Но вичкоса удж абу кыскöма том мортöс. Вöлöгдаын, кор шыалö нин революциялöн горыс, пуксьö 1917 во, Попов пырöдчö общественнöй уджö, лоö карса велöдчысьяслöн Котырын нырщикъясысь öтиöн. Сійö жö вонас, сьöм чöжыштöм бöрын, том морт мунö Перым карö да пырö велöдчыны сэтчöс университетлöн юристъясöс дасьтан факультетö.
Дмитрий важöн нин кöсйис лоны юристöн. Но олöмыд ас ногыс бергöдчис. Сьöмöн топöдіс да, Поповлы ковмис эновтны университеттö, бöр локны Усть-Сысольскö. Тані 1918 вонас том войтыр лöсьöдöны карса велöдчысьяслысь котыр (союз). Пырö сэтчö и Дмитрий Попов.
Выль котырысь медся зільяссö, кыдзи ме казьтыштлі нин, босьтöны удж вылö Усть-Сысольскса земствоö. Кыдзи нö Д.С.Попов лои газетса редакторöн? Та йылысь сійö ачыс казьтыштіс 1937 вося ноябрын, кор НКВД топöдіс вöвлöм редакторöс да "буржуазнöй национализм" пöльтöмысь пуксьöдіс морттö уна во кежлö. "Усть-Сысольскын ме шыöдчи А.М.Мартюшев дорö (сэки веськöдліс карса земствоöн), медым сетіс меным кутшöмкö удж, — висьталіс допрос дырйи Дмитрий Степанович. — А сійö вöзйис меным лöсьöдны выль газет. Шуис на: тэ пö кутан сöмын котыртана уджсö нуöдны, а гижöдъяссö мöдасны дасьтыны земствоын зільысь войтыр. Но став нок-тöждыс менам пельпом вылö уси".
Кыдзи тöдса, 1918 волöн июнь 15 лунö Усть-Сысольскö воис гöрдъяслöн ыджыд котыр, кодöн веськöдліс С.Н.Ларионов. Сылöн водзмöстчöмöн карын чужи большевикъяслöн организация. Дмитрий Степанович аддзысьліс Ларионовкöд. Мöдыд вöзйис "Зырянская жизньса" редакторлы йöзöдны Коми мулöн ылі сикт-грездысь унджык гижöд, ёнджыка мыджсьыны газетлы отсасьысьяс вылö.
А большевикъяс Д.С.Поповлöн мыш сайын шуисны нин вöтлыны морттö. Июль 22 лунö уездисполкомлöн индöд серти Дмитрий Степановичöс мездісны редакторлöн уджысь. Вежон мысти карса ЧК босьтчыліс весиг мыждыны Поповöс Сöвет власьтлы паныд сувтöмысь, но кыдзкö тай лэччысис жö-а... Кывкöртöдыс вöлі татшöм: революционнöй трибуналлöн судö пö Поповлысь делöсö не сетны, а газетлöн гижöдъясын оз ков чинтыны Сöвет власьтлысь тöдчанлунсö. Но вöвлöм редакторлы тайö индöдъясыс эз нин инмыны. Д.С.Попов пырис уджавны уездса народнöй образование отделö.
Олöм-вылöмыс дыр на шыблаліс öтарö-мöдарö Дмитрий Степановичöс. Босьтлісны сійöс и гражданскöй война вылö. Сы бöрын велöдчис водзö Мöскуаын, лои экономистöн. Кор пансис немечьяскöд Ыджыд война, муніс фронт вылö да сöмын 1946 воын воис Сыктывкарö. И унджык кадсö, кöть и висьöдчис нин, уджаліс Госбанклöн Коми контораын. Кувсис Д.С.Попов 1952 воö.
Со татшöм мортöн вöлі "Зырянская жизнь" газетса медводдза редактор Дмитрий Степанович Попов, коді пуктіс тшöтш ассьыс пай коми газет-журналъяс чужтöмö да сöвмöдöмö. И таысь сылы муöдз копыр.