Быд кагалöн эм право овны семьяын, тшöтш и ичöтик Анжеликалöн (снимок вылын). Но талун сылöн абу мам ни бать. И татшöм дзолюкыс миян республикаын зэв на уна.

Тшöкыда на овлö, кор быдмысь мортлы оз бура овсьы гортас. Бать-мамыс юöны да лёка дöзьöритöны ныв-писö, нöйтöны, оз вердны, оз пасьтöдны. Сэки тыр правоа комиссияяс вермöны босьтны кагаöс семьяысь. Уна бать-мам пыксьöны, синва сорöн да Ен могысь корöны быдтаснысö кольны, вежöны оласногсö да пондöны бурджыка видзöдны быдтас бöрсяыс. Но эмöсь и сэтшöмъяс, кодъяслысь и мырддьынысö оз ков, асьныс эновтöны дзолюкъяссö, кольöны чужтöм бöрас роддомö, вайöны тубрасö гартыштöмöн кага керкаö, вайöдöны сой пöлöдыс детдомö, вöтлöны гортсьыс. Верман-ö таысь мыждыны найöс?

—А эм-ö миян татшöм правоыс? — юалöм вылö юалöмöн вочавидзис меным Сыктывкарса кага керкаысь главнöй врачöс вежысь Илья Адаменко.

Тайö учреждениеас (сійöс вöлі котыртöма 1923 воын) олöны пузчужöмсянь 5 арö-сöдз дзолюкъяс. Кызвыныс веськалöны татчö пузчужöм кагаöн. Öтияс тані олöны некымын тöлысь, мöдъяслы кага керкаыс лоö гортöн некымын во кежлö. Унджыкыслöн чужöмсяньыс сьöкыд висьöм. Оз став бать-мамлы тырмы терпенньöыс быдтыны найöс. Да и сьöкыда нёрпалысьяслы, Илья Евгеньевичлöн кывъяс серти, тані бурджык. Öд гортаныс абу позянлуныс колана ногöн дöзьöритны найöс, кöть кутшöм тöждысьысьöсь да шаньöсь пö эз вöвны мамыс да батьыс.

—Миян эмöсь дефектолог, логопед, невролог, реабилитолог, мукöд специалист. И воспитатель-медсестраяс сяммöны уджавны буретш татшöм челядьыскöд. Сэсся кагукъяс, заводитöны сёрнитны да, чуксалöны найöс мамöн. Ме аддза татчöс зільысьяслысь быдлунъя подвигсö. Збыльысь, колö лоны зэв ыджыд сьöлöмаöн, медым ра-дейтны зонпосниöс ассьыд нылöс да пиöс моз. Торйöн нин ви-сьысь челядьöс радейт-ны, а не жалитны.

Эмöсь тані и дзоньвидза челядь, кодъяс бать-мамыслы ковтöмöсь.

—Локтіс карö велöдчыны сиктса нывка, тöдмасис том морткöд, кынöмасис, а зонмыс эновтіс сійöс. Висьтавны та йылысь аслас бать-мамыслы нылыд оз смелмöдчы. Аборт вöч-ны оз жö лысьт... Либö овны том мамлы некöн... Уджтöмалö... Кага вайысь ачыс быдмылöма детдомын да абу велалöма тöждысьны кодкö мöд вöсна... Нывбаба гортсьыс мунöма да кольöма пузчужöм кагасö верöсыслы... Пöлыс кувсьöма, а аньлöн керка тырыс посниысь-посни челядь... Татчöс быд кага — тайö торъя история. Быд кага сайын — ыджыд шог. И мыйысь мыждыны? Ми кутам йитöд öткымынлöн бать-мамыскöд. Кодсюрö волывлöны видлыны ассьыныс ныв-писö, а эм кö позянлуныс, босьтлывлöны найöс гортас шойччан лунъясö да отпуск-каникул дырйи. Кутшöмкö кад мыс-ти, ладмöдасны олöмсö да, босьтöны дзикöдз.

Кага керкаын олö 60 дзолюк, и на пиысь 26-ыслöн эмöсь бать-мам. Гашкö, кызь квайтнан кагасö найö босьтасны бöр, а гашкö, сідзи и верстяммасны нывкаяс да зонкаяс детдомын, оз кö аддзысьны выль бать-мам. Ичöт челядьöс окотапырысьджык босьтöны опека улö да ныв-пи пыдди. И татчöс быдтасъясысь унаöн веськалöны семьяясö. Кодсюрö öні олöны суйöр сайын.

—Ми быдöн йылысь тö-дам, мукöдыскöд кутам йитöдъяс.

Илья Адаменко петкöдліс верстяммöм нин ныв-зонлысь снимокъяс. Нюмъялöны. Синъясыс шудаöсь.

—Миянлы нимкодь, мый налы мойвиис, мый найö веськалісны бур да тöж-дысьысь бать-мам дорö.

Но эмöсь сэтшöм челядь, кодъяс государствоысь кындзи некодлы оз ковны асланыс сьöкыд висьöм понда.

Илья Евгеньевич висьталіс, мый налы зэв ёна отсасьöны пöпечительяс да волонтёръяс. Öтияс вичмöдöны сьöм, могмöдöны став коланаторнас, тшöтш и юан ваöн, мöдъяс гуляйтöны да ворсöны челядькöд. И кар-районса олысьяс оз öтдортчыны — пырöдчöны акцияясö, вайöны чачаяс, паськöм, памперсъяс, уна мукöд коланатор.

—Ме тані во на и уджала, а сэтшöма нин велалі дзолюкъяс дорас. Тöда, кодлöн кутшöм öбича-этшыс, кодлöн кутшöм радейтана чача, коді мый радейтö сёйны. Öтитор — уджавны больничаын, сэні челядьыд вежласьöны (Илья Евгеньевич 6 во зільöма челядьлы респуб- ликаса бурдöдчанінын реа-ниматологöн — Авт.). Мöдтор — тані, кор уна во олан öти котырöн, öти семьяöн.

А гортас сійöс виччысьö 4 арöса Максим пиыс. И сэтшöм пö окота, мед став дзолюкыслöн вöлі горт. Медым и ичöтик Анжелика сулаліс дзиръя дорын да виччысис батьыслысь удж вылысь воöмсö, а сэк костті мамыс пöжасис, а шойччан лунъясö ставныс öтвылысь ветлывлісны чери кыйны, роликöн иславны. Медым водöм водзас батьыс сылы мойдіс, а асывнас мамыс пальöдіс бандзибсö меліа окыштöмöн.